ЖАҢЫ ЖЫЛДА БАЛДАРЫБЫЗГА ЖАРКЫН КЕЛЕЧЕК КААЛАЙЛЫ

Кечээ, 28-декабрда Өзгөчө кырдаалдар министрлигинин борбордук аппаратында ден соолугунан мүмкүнчүлүктөрү чектелүү балдардын жана балдарын жалгыз тарбиялап, өстүрүп жаткан ата-энелерге жана балдарга Жаңы жылдык белектер тапшырылды.

Балдардын жүрөгүнөн түнөк табуу, алардын маанайын көтөрүү майрамдык иш-чарасы министрликтин өлкө аймагындагы башкармалыктарында да өткөрүлүп, жүздөгөн балага майрамдык маанай тартуулашты. Алар онлайн байланышка чыгып, ӨКМ башчысынын каалоо-тилегине ортоктош болушту.

Министр, генерал-майор Бообек Ажикеев майрамдык салтанаттын башында туруп, Өзгөчө кырдаалдар министрлигинде күжүрмөндүк менен иштеп, мекен үчүн жанын аябаган өздүк курамдын ичинде колдоо көрсөтө турган үй-бүлөлөр бар экендигине токтолду.

Учурда өзгөчө балдарды тарбиялаган жана балдарын жалгыз өстүрүп жаткан ата-энелердин эмгеги зор. Андыктан министрликтин башчысы келерки жылы үй-бүлө мүчөлөрүнө бактылуу балалык, шаңдуу маанай, бекем ден соолук, балдарга жаркын келечек каалады. Ошондой эле жалпы кыргызстандыктарга жакшылык тилеп, ар кандай кырсыктардан тышкары болуусун айтып өттү.

КР ӨКМ ПРЕСС БОРБОР