Өзгөчө кырдаалдар министри Канатбек Чыныбаев Ысык-Көл облусуна иш сапары менен барды

 Кыргыз Республикасынын Өзгөчө кырдаалдар министри Канатбек Чыныбаев Ысык-Көл облусуна иш сапары менен барды.

Министр Чолпон-Ата шаарындагы, Булан-Сөгөтү айылындагы жана Түп районундагы өрт-куткаруу бөлүктөрүнүн абалы, ошондой эле алардын материалдык-техникалык камсыздалышы жана өздүк курамдын кызмат өтөө шарттары менен таанышты.

Бактуу-Долоноту жана Темир айылдарында жээк бекемдөө иштеринин жана сел өткөрүүчү каналдардын курулушунун жүрүшү текшерилди. Бул долбоорлор 90дон ашуун турак жайларды жана чарбалык объектилерди табигый кырсыктардан коргоого багытталган.

Мындан тышкары, Чолпон-Ата шаарындагы №2 мамлекеттик резиденциянын аймагындагы объектилер каралып, канал бекемдөө иштери аяктаганы белгиленди. Ошондой эле Ысык-Көлдүн акваториясын тазалоо боюнча суу алдындагы кызматтын ишмердүүлүгү менен таанышуу жүргүзүлдү.

Иш сапардын жыйынтыгында өзгөчө кырдаалдардын алдын алуу чараларын күчөтүү жана жүргүзүлүп жаткан иштердин натыйжалуулугун жогорулатуу боюнча тиешелүү тапшырмалар берилди.