ӨКМ ЫСЫК-КӨЛДӨ ӨТҮП ЖАТКАН «СУУДАГЫ ФОРМУЛА-1» ДҮЙНӨ ЧЕМПИОНАТЫНДА КООПСУЗДУКТУ КАМСЫЗ КЫЛУУДА

Ысык-Көлдө суу-мотор спорту боюнча «Суудагы Формула-1» дүйнө чемпионаты старт алды. Мелдештин катышуучуларынын, уюштуруучуларынын жана көп сандаган көрүүчүлөрдүн коопсуздугун камсыз кылуу максатында Кыргыз Республикасынын Өзгөчө кырдаалдар министрлиги күчөтүлгөн кызмат өтөө тартибине өткөрүлдү.

Мелдеш өтүп жаткан аймактарда ӨКМдин күчтөрү жана каражаттары сутка бою нөөмөттө турушат. Акваторияда куткаруучу кайыктар, суучулдар бөлүмдөрү, өрт-куткаруу эсептери жана өзгөчө кырдаалдарга ыкчам чара көрүүнү камсыз кылган адистер кызмат өтөшөт.

Мелдештин алдында ӨКМ кызматкерлери техникалардын, куткаруу жабдууларынын, байланыш каражаттарынын жана өздүк курамдын даярдыгын текшерүү боюнча комплекстүү иш-чараларды өткөрүштү. Өзгөчө көңүл спортчулар, калыстар тобу, уюштуруучулар жана миңдеген көрүүчүлөр бир учурда боло турган суудагы коопсуздук маселелерине бурулду.

Мүмкүн болуучу өзгөчө кырдаалдарга ыкчам чара көрүү үчүн бардык тартылган бөлүмдөрдүн жоопкерчилик аймактары алдын ала аныкталып, куткаруу техникаларынын кыймыл маршруттары, ошондой эле медициналык кызматтар, укук коргоо органдары жана эл аралык спорттук иш-чаранын уюштуруучулары менен өз ара аракеттенүү алгоритмдери иштелип чыкты.

Даярдык көрүүнүн өзүнчө этабы катары ӨКМдин суучулдары практикалык машыгууларды өткөрүштү. Машыгуулардын жүрүшүндө куткаруучу кайыктардын ылдам маневр жасоосу, шарттуу кырсык болгон жерге ыкчам жетүү жана жабыркагандарга жардам көрсөтүү боюнча аракеттер иштелип чыкты. Мындай машыгуулар эл аралык мелдештерди өткөрүү учурунда куткаруу бөлүмдөрүнүн дайыма жогорку даярдыкта болушун камсыздайт.

Мелдеш учурунда ӨКМ кызматкерлери акваториядагы жана адамдар көп чогулган жайлардагы кырдаалга туруктуу көзөмөл жүргүзүп, зарыл болгон учурда ыкчам жардам көрсөтүшөт.

Өзгөчө кырдаалдар министрлиги жарандарды коопсуздук талаптарын так сактоого, уюштуруучулардын жана ыкчам кызматтардын кызматкерлеринин көрсөтмөлөрүн аткарууга, ошондой эле мелдешке катышуу жана көрүү учурунда этият болууга чакырат.

Эл аралык спорттук иш-чараларды өткөрүүдө адамдардын коопсуздугун камсыз кылуу Өзгөчө кырдаалдар министрлиги үчүн ар дайым башкы артыкчылык бойдон калат.