ӨКМ КЫЗМАТКЕРЛЕРИ БАЛДАР ҮЧҮН КООПСУЗДУК БОЮНЧА ТААНЫТУУ ИШ-ЧАРАСЫН ӨТКӨРҮШТҮ

1-июнь Балдарды коргоо күнүндө Кыргыз Республикасынын Өзгөчө кырдаалдар министрлигинин кызматкерлери балдар үчүн коопсуздук эрежелерине арналган таанытуучу иш-чара өткөрүштү.

Иш-чаранын жүрүшүндө куткаруучулар өрт коопсуздугунун эрежелери, сууга түшүүдөгү коопсуздук чаралары жана өзгөчө кырдаал жаралган учурда кандай аракет көрүү керектиги тууралуу маалымат беришти. Ошондой эле кооптуу кырдаалдарда 112 бирдиктүү кызматына чалуунун тартиби түшүндүрүлдү.

Мындан сырткары, ӨКМ кызматкерлери алгачкы жардам көрсөтүүнүн негизги ыкмаларын, анын ичинде жара таңуу, кан агууну токтотуу, жүрөк-өпкө реанимациясын жүргүзүү жана жасалма дем алдыруу боюнча практикалык көрсөтмөлөрдү беришти.

Балдар иш-чарага активдүү катышып, пайдалуу маалыматтарды алып, коопсуздук боюнча өздөрүн кызыктырган суроолоруна жооп алышты.

Мындай иш-чаралар жаш муундун коопсуздук маданиятын калыптандырууга жана өзгөчө кырдаалдарда туура аракеттенүү көндүмдөрүн өнүктүрүүгө багытталган.