КЫРГЫЗСТАН МЕНЕН ЯПОНИЯ ӨЗГӨЧӨ КЫРДААЛДАРДЫН КЕСЕПЕТТЕРИН ЖОЮУ БОЮНЧА КЫЗМАТТАШТЫКТЫ ЧЫҢДООДО

Бүгүн, 6-октябрда Бишкекте Кыргыз Республикасы менен Япониянын ортосунда эки күндүк билим алмашуу иш-чарасы башталды. Иш-чара өзгөчө кырдаалдарга даярдык көрүү жана жооп кайтаруу системаларынын натыйжалуулугун жогорулатууга багытталган.

Иш-чара Дүйнөлүк банк, Кыргыз Республикасынын Өзгөчө кырдаалдар министрлиги жана Япониянын Өрт жана табигый кырсыктарды башкаруу агенттиги (FDMA) тарабынан уюштурулууда.

Конференцияга Өзгөчө кырдаалдар министринин биринчи орун басары Азамат Мамбетов, Дүйнөлүк банктын Кыргыз Республикасындагы өкүлчүлүгүнүн менеджери Хью Ридделл, Япониянын Кыргыз Республикасындагы Атайын жана Ыйгарым укуктуу элчиси Года Хидэки мырза, ошондой эле Өзгөчө кырдаалдар министрлигинин кызматкерлери, эл аралык уюмдардын өкүлдөрү, тиешелүү эксперттер катышууда.

Максаты – климаттын жана табигый тобокелчиликтердин күчөшүнө байланыштуу терең тажрыйба алмашуу.

Иш-чаранын программасы төрт негизги багытты камтыйт:

- өрт өчүрүү системаларын уюштуруу жана башкаруу;

- ири масштабдагы кырсыктарга жана кесепеттерге каршы чараларга, анын ичинде алдын ала эскертүү системаларына, маалымат каналдарына жана алдын алуу иш-чараларына даяр болуу;

- кадрдык ресурстарды өнүктүрүү жана эл аралык кызматташуу;

- шаардык издөө-куткаруу (USAR) окутуу жана ыкчам жайылтуу.

Практикалык аспектилерге өзгөчө көңүл бурулат: реалдуу сценарийлердин интерактивдүү моделдөөлөрү катышуучуларга чечим кабыл алуу алгоритмдерин сынап көрүүгө жана өркүндөтүүгө жана өзгөчө кырдаалдарга чара көрүү боюнча мыкты тажрыйбаларды талкуулоого мүмкүндүк берет.

Анда Кыргызстандын Өзгөчө кырдаалдар министрлигинин өкүлдөрү жана Япониянын FDMA эксперттери баяндама жасашат.

Бул кызматташтык кырсыктардын тобокелдигин азайтуу, климаттык чакырыктарга туруктуулукту жогорулатуу жана эл аралык өнөктөштүктү кеңейтүү боюнча Кыргызстандын институционалдык потенциалын чыңдоо үчүн жаңы мүмкүнчүлүктөрдү ачат.

КР ӨКМ ПРЕСС-БОРБОР