КООПСУЗДУК АР БИРИБИЗДЕН БАШТАЛАТ: БУУӨП ЖАНА ӨКМ EU FEST 2026 ФЕСТИВАЛЫНДА ИНТЕРАКТИВДҮҮ ПАВИЛЬОН ТАРТУУЛАШТЫ

6-июнда Бишкектеги Эмен багында, EU FEST 2026 фестивалынын алкагында Кыргыз Республикасынын Өзгөчө кырдаалдар министрлиги (КР ӨКМ) БУУӨП менен биргеликте өзгөчө кырдаалдарга даярдык көрүүгө, табигый кырсыктардын тобокелдигин азайтууга жана коопсуздук маданиятына арналган интерактивдүү павильонду тартуулады.

Европа Биримдигинин (ЕБ) Делегациясы ЕБге мүчө-мамлекеттер жана өнөктөштөр менен биргеликте уюштурган бул фестиваль быйыл “Journey Across Europe” (Европа боюнча саякат) темасынын алдында өттү. Ал баарлашуу, билим алуу жана Европа Биримдиги тарабынан Кыргызстанда колдоого алынган демилгелер менен таанышуу үчүн ачык аянтча болуп калды.

БУУӨП менен ӨКМдин биргелешкен павильону өзгөчө кырдаалдарга даяр болуу – бул куткаруучулардын жана мамлекеттик кызматтардын гана иши эмес экенин көрсөттү. Бул – ар бир адамдын билими, кыраакылыгы жана жөнөкөй практикалык көндүмдөрү өмүрдү, үй-бүлөнү жана жамаатты сактап калууга жардам бере турган жалпы иш.

Аянтчада ӨКМдин мобилдик авариялык-куткаруу станциясы — ыкчам аракеттенүү жана окутуу үчүн колдонулган атайын жабдылган автобус жайгаштырылды. Анын жанында куткаруучулар биринчи жардам көрсөтүү боюнча практикалык көнүгүүлөрдү көрсөтүп, базалык аптечкада эмнелер болушу керектигин айтып беришти. Ошондой эле келгендерди куткаруу шаймандары менен тааныштырып, өрт өчүргүчтү кантип туура колдонуу керектигин үйрөтүштү.

Фестивалдын меймандарында БУУнун Табигый кырсыктардын тобокелдигин азайтуу боюнча башкармалыгы (UNDRR) тарабынан иштелип чыккан “Stop Disasters” онлайн-оюну өзгөчө кызыгууну жаратты. Чоң экранда катышуучулар өздөрүн шаар куруучу катары сынап көрүп, калктуу конуштардын коопсуздугу көз каранды болгон чечимдерди кабыл алышты: үйлөрдү кайсы жерге куруу, дарыя жээктерин кантип бекемдөө, жер титирөө, суу ташкыны жана токой өрттөрүнүн коркунучун кантип азайтуу керектигин чечишти. Оюн туруктуулук туура пландаштыруудан башталарын жана картадагы каталар турмушта кымбатка турарын айкын көрсөттү.

Интерактивдүү формат балдарды да, чоңдорду да тартууга мүмкүнчүлүк берди. Кээ бирөөлөр үчүн бул коопсуздуктун негизги эрежелери менен алгачкы таанышуу болсо, башкалар үчүн өзгөчө кырдаалдарга даярдык жөнөкөй аракеттерден башталарын эске салган маанилүү сабак болду. Атап айтканда: шашылыш кызматтардын номерлерин билүү, аптечканы даяр алып жүрүү, эвакуация эрежелерин түшүнүү жана дүрбөлөңгө түшпөй, тынчтыкты сактай билүү.

ӨКМ менен БУУӨПтүн EU FEST 2026 фестивалына биргелешип катышуусу — табигый кырсыктардын тобокелдигин азайтуу, климаттын өзгөрүшүнө ыңгайлашуу жана жамааттардын туруктуулугун жогорулатуу жаатында улуттук потенциалды бекемдөө боюнча узак мөөнөттүү өнөктөштүктүн дагы бир далили болду.

БУУӨП жана ӨКМ климаттык туруктуулукту, өзгөчө кырдаалдарга даярдыкты жана Кыргызстан элинин коопсуз келечегин илгерилетүүдө стратегиялык өнөктөш болуп саналган Европа Биримдигинин колдоосун жогору баалайт.

Павильондун негизги жыйынтыгы жөнөкөй: коопсуздук — бул өнүктүрүүгө мүмкүн болгон жана өнүктүрүүгө тийиш болгон көндүм. Өзгөчө кырдаалга чейин, ал учурда жана андан кийин кантип аракеттенүү керектигин канчалык көп адам билсе, бүтүндөй өлкө ошончолук туруктуу жана коопсуз болот.